〔廣州〕得名於三國

yinkk

南越國嘅歷史總共得九十三年，趙佗嘅統治佔咗三分之二，南越國嘅範圍包括喺依家嘅〔廣東〕、〔廣西〕同〔越南北部〕。
由廣州市解放北路象崗發現嘅〔南越王墓〕出土嘅大批珍貴文物話畀我哋知，南越國時期通過同中原嘅貿易，廣泛使用鐵器工具，出現咗青銅冶鑄業，手工業同造船業、紡織業亦都發展起來，仲形成咗以珠江三角洲爲主嘅〔粵語〕區，漢字成爲南越國嘅官方文字。
公元前111年，漢武帝平定咗南越國，喺嶺南設咗〔南海〕、〔蒼梧〕、〔鬱林〕、〔合浦〕、〔交趾〕、〔九眞〕、〔日南〕、〔珠崖〕、〔儋耳〕等九個郡，又叫做〔交州〕。
合久必分，分久必合。歷史又翻過咗三百幾年，到咗〔三國〕混戰嘅時期，當時嶺南屬於〔東吳〕管轄，將交州分爲交廣兩州，即係依家廣西嘅合浦以南爲〔交州〕，合浦以北爲〔廣州〕。廣州就喺呢個時候得名，而且仲管轄〔南海〕、〔蒼梧〕、〔鬱林〕、〔合浦〕四個郡。
由公元226年起，原來嘅〔番禺城〕、〔趙佗城〕正式叫做〔廣州〕，仲沿用至今。
由呢度推算，廣州名稱嘅出現至到依家有一千七百七十七年，但係〔廣州〕建城就有兩千兩百一十七年。
東吳沿用東漢嘅州、郡〔國〕、縣三級地方政制，州長官爲〔牧〕或者〔刺史〕，郡長官爲太守〔都尉〕。廣州管轄南海、蒼梧、鬱林、高涼、高興五郡。而〔南海郡〕就管轄番禺、四會、增城、龍川、博羅、揭陽、平夷七個縣。由咁推算，嗰陣時廣州管轄嘅範圍有依家嘅半個廣東省咁大。
公元265年，司馬炎做咗皇帝，建立西晉。公元280年，廣州納入咗西晉版圖。西晉實行郡縣制同分封制，朝庭喺廣州設置嶺南嘅最高軍政長官。
公元316年，南海郡除咗管轄〔番禺〕、〔四會〕、〔增城〕、〔博羅〕、〔龍川〕等六個縣之外，仲增置〔西平〕、〔順化〕兩個縣。
公元420年，進入南北朝時期。南朝嘅地方政制同東晉一樣，但係州、郡嘅數目就激增，州、郡管轄嘅範圍就變得更爲狹細。劉宋時期，廣州總共管轄十信息論上郡，廣州轄下嘅南海郡，就管轄十個縣。
蕭齊時期，廣州管轄二十三個郡，南海郡增置〔新豐〕、羅陽〔博羅〕、〔安遠〕、〔河源〕四個縣。
〔廣州〕呢個名，由東吳朝代起出現，喺呢個之前同之後，經歷咗〔番禺〕、〔廣州府〕、〔興王府〕等名字嘅變遷，而事實上，兩千幾年之前，〔南國〕呢座城市就喺越秀山麓、珠江河畔出現咗！
資：九唔搭八．2011年2月16日
〔圖：網絡．修〕
〔譯：蕭南仁．2016年9月3日〕
〔廣東風情．廣東話資料館〕