特意感謝郭博士介紹玩天九

erict

　　兩三星期至今，從一路追住玩天九，再擺開幾日，又玩番，再擺開一兩日，又玩番，有不少對人對事新角度。

　　例如今晚想起一句：天將降大任於斯人也，必先苦其心志，勞其筋骨，餓其體膚......真係要做好一件事，講時機，火喉等等。如果你真係有料，又何妨今天屈就一下？你驚你有料冇人賞識？如果你真係有料，你駛驚你一世都係喺呢個位置？天九八隻牌，有高有低，係咪要下下強攻？高腳七想贏長衫？發夢都冇咁早！形勢比人強之時，又何妨就一就，伺機而動？今晚，忽然回顧過去，總結得失，重新抖擻起來，再次重新上路。

　　又例如：天九文武字，真係有陰有陽。陽者，或可解作攻；陰者，為守。假設程式合謀贏你為例，明知係三抽一，你由一開始就係劣勢；明知對方三份牌，不停交錯攻你最弱之處，你又如何處理？佯作攻文字，回馬鎗留隻八九，合乎陰陽之道，換句廣東話，就係到最後兩隻牌有文有武，你開邊一瓣我都有優勢。文武字，就係陰同陽，故此，有天九地八人七，更可以一次過出天天九九，地地八八，完全合乎陰陽之道。

　　雖然目前最高只是190分左右，但前者更難。因為，天九只得八隻牌，每次出擊後，係乘數效應相扣，由一隻牌影響其後七隻牌再籌謀出擊策略，再謀求最後一擊勝利，再陰謀論一點假設其他三家都係同一陣線，每一局要贏，條數真係唔識計。或然率有所謂co-existence，而每一次出之後又係mutually exclusive，嘩，真係唔識計。

　　我相信，玩天九到家，出色，或者，文武子就係股市金融外匯嘅LONG VS SHORT，馬仔嘅WIN VS NOT TO WIN（不包括入三甲，即係位置），選擇工作職位VS人工，講到呢度，真係發現原來有好大想像及看似有可為的其他層面......

　　再次感謝郭博士，天九呢科嘢，又點止係八隻牌咁簡單？

　　斗膽分享一些我玩天九時心得：
一，四上四落－－每次開局，抽出四隻文武字大牌，其他四隻稍弱牌就由大打到細；大牌就由細打到大。我試過咁玩，粗略估計贏面有六七成。
二，留三文一武或三武一文－－我發現程式不停攻你最弱之處（我先假設電腦其他三副牌合謀）。即使退一萬步睇，你要贏到最後一擊為之贏，所以，不管是否合謀，原則上你係八隻牌對廿四隻牌，絲毫不差。所以，我個經驗係，好多情況之下，留三文一武較好，哪怕武子係大雞，都唔怕，可能最後包尾殺要靠佢。
三，有大牌打大牌－－盡力每一章牌谷其他三家出大牌。因為我玩過不下四五百舖，似乎個電腦程式係set死有大出大。再結合第一點，如果我估計係真，四隻細牌谷大牌出，再回馬牌出大牌，粗略估計贏面去到七八成。
四，至尊出唔出？－－如果各位要贏到五百分或以上，除了我估計起碼要連庄幾十舖之外，最好係你玩到有二百幾分而下一舖有壓氟性優勢再配合有至尊，再包尾殺。因為，我試過好多舖，一有至尊組合在手之後幾舖，副牌好爛，好難有贏面。
五，陰陽式波浪罩門－－之後提及過程式有罩門，是小弟估計。但似乎上次講完之後，又確係有十舖八舖係有幾個位電腦有死穴。而我玩過幾百舖，起碼有十幾舖牌係熟口熟面，所以，我估計個程式係有波浪性。所以，我估計，當你手上有至尊組合，就係你份程式牌內最高峰，亦即是有機會可以贏到最高分數。反之，如果至尊之後連續幾舖爛牌，就係波浪之後下墮，你要再等下一個起頭浪，全力乾炒其他三家，再累積高分，配合至尊組合再出現，一個唔該出到而分數係原本130或140分，至尊係另外乘四乘五的話，即係過五百分，你就有機會比Dr睇你個分，威威食雞。不過......都係我估計，我冇辦法證明到是否有波浪式靚牌，但似乎個程式話到比我聽係咁。

容燥兒

閣下所講的一部份，我亦感覺到。

有同學話玩極無5百幾分。
我亦叫佢唔好輕言放低。

玩熟對做人做事好有幫助
至少做事會知所進退，等待時機。

唔會變咗，硬撞硬，有位又唔上。
等等。

就牌咁少，咁短時間，就要計算哂成個形勢。
呢個游戲係好好訓練。

erict

　　玩之時，都唔係鐵板一塊，唔一定四上四落，計到有壓倒性優勢可以強攻；反之，如果成手都係細路仔，唯有谷晒大牌再度點贏最後一擊。總之，都好蝦人玩。

digital21

這款APP贏電腦七八機率並不難,難度在於連贏10個以上,至尊結牌只是雙倍分,要4只牌結牌才有4倍分,我認為博士提到搶先這招是非常實用

楊灝貽

已經冇法再同打機要好玩同「悟」到哲理嘅人共嗚
自從中學知道有得修改電子遊戲之後, 仲有駭客爭相提供免費娛樂
已經冇心再同跟遊戲規則努力
淨係掛住搵程式碼/修改軟件搞寸隻GAME