|
價廉產品大眾化，賣魚佬、菜販大聲叫賣，是香港傳統濕街市的特色。領匯卻一反傳統，將樂富街市翻新後，設紅酒館、又售賣高級牛扒、羊架、芝士等，場內更特設顧客服務中心、手推車。
舊商販指街市翻新後恍如大型連鎖高檔超市，領匯又瘋狂加租四倍，最終可能被逼走，令人情味濃厚的傳統舊街市將消失得無影無蹤。
走入樂富街市，迎面而來的是穿上制服的職員為你介紹產品，當眼處不乏高級透明玻璃牛肉櫃，旁邊更是紅酒館，顧客喜歡甚至可以踢住人字拖坐下小酌一杯，但訪問當日，紅酒館正「拍烏蠅」。
街市去年10月翻新後重開，整個街市改頭換面，舊檔主被安排逼在場中央，四周就安插多間高檔商店，售賣壽司、貴價牛扒、芝士等高檔貨品。
果檔失熟客生意急跌
街市翻新後雖較光猛及乾淨，生意卻無增加，受害最終是一班扎根十幾年的舊檔主，月初一眾舊商販在街市抗議，在檔口前舉起「生意慘淡、做極都唔夠畀租」、「加租加四倍、生意跌十足」等標語。
余太在樂富街市賣生果20多年，經歷過沙士、金融風暴的經濟低迷，仍屹立不倒。但領匯翻新樂富街市，卻是她惡夢的開始；生果檔的租金由原先約5,880元，瘋狂加至2.3萬元，加幅近三倍。但翻新後不少基層熟客流失，營業額只及以前約三成，「好多人當行超級市場咁，入嚟睇吓就算」。
復業只是短短數月，除了要面對領匯瘋狂加租、客源流失，生果批發價也大增一成，每日入不敷支，「日日都擔心唔夠錢交租，裝修之後未試過做夠錢交租」。
余太現時要供兩個子女讀副學士，「我想唔做，但係同領匯簽咗15個月合約，想走都冇錢賠，唔走又死梗」。她盼領匯可放她一馬，讓她退租離場。
樂富邨居民對新街市就有讚有彈，朱先生稱雖然翻新後更乾淨舒服，但價錢比以前貴，現時每餐需額外多花20多元，「感覺好似超級市場，但係比以前方便好多，又多咗選擇」。
居民蘇小姐就大讚街市選擇多，有生蠔、牛扒，「成間日式超級市場咁，似一田、UNY，好乾淨」。
規定商販着綠色制服
協助街市商販的公民黨立法會議員梁家傑稱，明白商戶經營困難，早前曾與領匯開會商討，據他了解，部分檔主與領匯已達成協議，可以提早離開。
領匯翻新旗下商場後，現在再到街市，多年來逼死了不少小商戶。馬鞍山耀安街市翻新後，目前只餘下三檔是舊商販，絕大部份都承受不了領匯瘋狂加租而結業。
耀安街市除了與樂富一樣有客戶服務中心，商販更清一色穿上領匯派發的綠色制服，每個檔位更設有顯示屏不停播放宣傳短片。大埔大元街市除了有紅酒館，阿信屋等零售店更進駐街市。
在耀安街市經營20多年仍留守的商販批評，政府製造「領匯霸權」，街市將與商場一樣，最終由領匯壟斷，欺壓小本經營，「佢哋瘋狂加租，慢慢淘汰舊商戶，想做到好似連鎖超市咁，以後唔會再有濕街市，變相引入集團式經營，我哋根本冇得做。」
| 
發表於 2014-2-6 01:10:01
收藏