最暢銷學術書

CarmenNg

42歲法國經濟學家Thomas Piketty，22歲就攞到倫敦政治經濟學院博士學位，政治方面支持社會黨，因讀書時已研究「收入不公平」（income inequality）現象，一直以來專心進攻呢個範疇，首先研究法國，繼而研究英語國家過去三百年之收入分配歷史，寫成七百頁嘅書本「Capital in the21st Century」，以法文寫，一出轟動，哈佛大學出版社醒目，立即搶咗英文版權，出版英文版本，據CNN報導，至上個星期Piketty訪問美國，旋風式到華盛頓、紐約、波士頓及三藩市做新書推廣路演之前，已售出41000本，再急印25000本應市，創下哈佛大學出版社101年來「單一年份最暢銷」嘅紀錄，唔知中台港有邊間出版社可以搶到中文出版權呢？
Piketty在美國接受CNN、路透社、Yahoo、MSNBC訪問，風頭一時無兩，美國「自由派」經濟學大師克魯明、史蒂格拉斯大讚新書出色，前哈佛校長/財長森瑪斯出馬主持新書發佈會，點解咁捧場呢？美國紐約時報已有書評人將此書與亞當史密之「原富」，馬克思之「資本論」相提並論，話係三本改變世界思維嘅巨著，令左丁山心思思想即刻買嚟讀吓，但亞馬遜話已經斷市，要排隊輪候！據講此書評論分析income inequality之形成及長期趨勢，市場不能阻止，必須由政府出手干預。有趣的是，Piketty嘅數據分析顯示，奧巴馬上台後，美國之「收入不公平」程度比小布殊時期更加嚴重。
左丁山不時在本欄提出，因為救市而推出之西方式量化寬鬆，日本式之「安倍三箭」，中國式之「四萬億元基建」，同是促進收入分佈不公、財富分配不公平嘅主因，政府藉口刺激經濟印銀紙，其實係五鬼運財，將資金與財富透過股市與地產復甦，轉送俾有資產人士，無產階級未必得益，即使得到加薪亦不及股票炒家揸騰訊升幾個價位啦！左丁山係市場派，但反對政府救市，救市即係鼓勵有產階級炒股炒樓有贏冇輸，點會公平公道呀？
（後話：讀者Chik先生再來電郵批評左丁山講奧巴馬訪問布魯塞爾之花費，指左丁山強辯。Chik先生引述之資料，源於英國每日郵報Mail Online（3月25日），左丁山睇之星島日報外電譯本，源於Mail Online之4月7日報導，你估係老作咩？）






左丁山