分享一則心念一轉，真係天大地大

erict

　　話說上周回家探望父母，皆因姊姊問我仲有無神仙水，因為媽媽問仲有無。佢問得，即係有噴，即刻成個彈起，拿拿臨回家。而家母患有糖尿病，幸得郭博士之助，距今一年有多，身體健康正常。得人恩惠千年記，再此再一次感謝郭博士幫助，回想起一年多前，無助及低落是我的好朋友，成個人在深淵，處低潮，家母成個人累到不想動身，看見也令人心酸，此刻想起，仍有點眼淚，強忍不要掉下來。郭博士大恩大德，小弟今生今世也不敢忘記。

　　之前在Whatsapp及回家後都有跟姊姊不時閒談，而有些說話我也不太想說出口。因為，一來我浪費了十年人生，也不是在家中的好榜樣。之前，姊姊二話不說，也在經濟上支援小弟。在情在理，今天姊姊人浮於事，我做細佬嘅係點都要幫吓手。人，特別係中國人，不多不少也因為面子問題，有些話說不出來。我不止一次暗示，既然我迷失了十年也可以企番起身，為何你不可以？既然我哋搵食架生比人哋多，點解我哋今日撈唔掂？

　　我告訴他，我在美國某個場合應考英中翻譯，得到美國頭10%的翻譯人員資格，而我套用郭博士之前說的例子：如果牛津，劍橋，哈佛或耶魯大學肯收你，即係你已有果個level的知識水平，之後，讀唔讀，都不過係一張砂紙而已。此刻，我在想，既然我已是美國頭10%英中翻譯好手，即係話我在美國三億人口中，計死數，點都可以應付到三千萬美國人口。既然有第三者及公開的應考佐證，我係咪非要真正拿到果張砂紙呢？

　　於是，我跟姊姊說，不如咁，我就用呢個牌頭打起，姊姊跟我組成翻譯團隊，用我呢個track record打天下，如果接到好多工作，分一半給她做，利潤對分（因為我的英文程度比姊姊好，而要顧存她的面子，我沒有說你做好之後再由我校對）。記憶中，猶太人做事的哲學好似係憑一人之力，做不了大事，只有適當地利用別人的長處，善加運用，就可以所謂做大個餅。中國成語也有所謂一人計短，二人計長。合姊姊之力，我馬上有多百分之一百工作時間，使我可以再花時間在各層面，找尋合適機會出擊。雖然我不懂所謂少勞多得，但我跟姊姊由細玩到大，信任這一層完全不需要考慮。而我最怕就係做事之時你估我，我估你，因為咁會非常虛耗彼此的精力及時間，每當我遇到呢種情況，我九成九打退堂鼓。

　　當我工作得疲累之時，有時會玩吓Age of Empire十數分鐘（我不算是沉迷，而是考自己在短時間保護城池及照顧隊友一起打天下，是既刺激又考自己在短時間內果斷施為的遊戲），我發現世事好多時都好奇妙，真係好視乎你點睇一件事。過往，我出的餿主意著實也有不少，有幾次請教Dr也給罵個狗血臨頭，頭頭還有一點嬲，但第二三次後就沒有嬲，因為，人哋鬧你，即係點醒你，等你唔好行埋D冤枉路。我發現玩遊戲要玩得出色，其實大有學問，真係好睇你點去理解一件事。例如之前大膽分享的POKEMON GO，是不是遊戲？是。是不是消閒？是。是不是好好玩？我未玩過。但如果你知道好多公司大量高薪請人做英語法語的網上地圖，你就知道POKEMON GO點止為遊戲咁簡單？仲未計POKECOIN，世界各地人的消費及生活模式，即使我昨日看寒戰二，一排人坐等入戲，驟眼看，也有數個係咁襟，係呢個層面，班日本仔美國佬真係贏晒你班友，唔寫個服字都唔得。想帶出嘅係，祝福文中，提及人都有創造事物的功能。既然我同姊姊都人浮於事，點解唔好好利用我係美國TOP 10%翻譯功夫呢個track record，主動出擊？

　　於是，今天，我自行設計網站，更成立翻譯團隊，全力攻擊歐美市場。我有一句話沒有跟姊姊說：為何我們一再以最弱打人哋最強，而不是反過來做？如果今天仍然係做前者，等於係電影一代宗師一線天張震一樣，有好功夫遇上不合適的時機，快刀手落難，只能做一個飛髮佬......我也有一句沒有跟姊姊說，因為說出來有時都好老土－－歐美各地加起來至少二三十億人口，能夠有1,000間公司，5,000個主管長期僱用你做散件，一單當係五十美元計，條數打兩折收入已經係天文數字，為何仍要以最弱打最強？因為我過往不是一個好榜樣，我又不喜歡未做先講，所以我作風比較保守，做咗先講。

　　講咗咁多，出於路向有點眉目，目標稍稍清晰，而不是擺款扮勁叻唔切，我相信係經常唸讀祝福文之助，感謝郭博士。我在此留言，因為我心力到今天可能稍好，但也是留下一兩句，時刻警惕自己，正如有一網友鼓勵，要有毅力，我盡力做到不偏離正軌，也分享我由低谷走出來的鮮活例子。我做得到的話，你也可以。在此，感謝各位，特別係有些素未謀面的網友，更覺珍貴。得到的鼓勵，精神上係有幫助，再戰江湖。實在很感激大家的一字一句鼓勵。

楊灝貽

一涉及錢實多事，最好問定郭生如何提防不歡而散

erict

楊灝貽 發表於 2016-8-1 18:38
一涉及錢實多事，最好問定郭生如何提防不歡而散

　　你好，我知道懷著好意提醒，多謝先。姊姊曾在我低潮時伸出援手，到今天哼都未哼過一句。今日我似有曙光，而她又暫時麻麻地，我伸出援手係應該。更何況係兄弟姊妹，起碼少咗一重你估我，我算你的麻煩事，而呢種心態亦係我最憎見到的，因為我多年來都遇過，好麻煩，所以以前遇到你諗我我算你的情況，我會提早斬纜，費事煩，因為我深深知道錢有鬼。
姊弟同心，其利斷金。如果換轉係以前，我一定多嘢諗。而家？根本好清楚，你處低谷時姊姊出手幫你，如果到今日似乎有少少前景睇到而你左諗右諗，你就唔係同佢生活咗好多年嘅細佬喇。例如：在你低潮時醒幾皮嘢你渡過低潮，其實個心意大過李生今日咁有錢，捐幾十億去香港人學喇。此刻，我想起Dr講有一個乞兒女無錢食飯都去廟添香油的故事。
呢份恩情，我今生今世都不會忘記......

wu_peace

好喜歡閲讀 Erict網友 的文章分享 , 筆觸細膩感人 , 字裏行間總是流露出真摯與誠懇之情 .

郭博士以及令姊有恩於您 , 而您又能感恩惦記並伺機回饋報答 , 這是值得讚賞的 .

既已找到方向和目標 , 實屬可喜 , 就朝標竿勇往直前吧 .

祝您成功！

楊灝貽

erict 發表於 2016-8-1 20:13
　　你好，我知道懷著好意提醒，多謝先。姊姊曾在我低潮時伸出援手，到今天哼都未哼過一句。今日我似有曙 ...

「更何況係兄弟姊妹，起碼少咗一重你估我，我算你的麻煩事」

我家上一輩就係咁, 開頭一個出技術一個出錢, 搵到大錢個時就出事
所以我一定唔會同親人親戚合作做生意
雖然兩家人嘅後人, 即我嘅堂兄弟姊妹, 個個三十歲已經可以退休

erict

wu_peace 發表於 2016-8-2 02:48
好喜歡閲讀 Erict網友 的文章分享 , 筆觸細膩感人 , 字裏行間總是流露出真摯與誠懇之情 .

郭博士以及令姊 ...

多謝. 會堅持到底. 其實真係天大地大, 對比我上一兩代人, 今日要創業, 輸贏唔知, 但機會真係多好多, 一有Internet, 再加一點想像力, 真係好多機會......假如唔得, 當交學費, 但好抵, 唔出去比拼吓唔知自己有幾多料, 呢吓真係幾好玩.

erict

楊灝貽 發表於 2016-8-2 16:40
「更何況係兄弟姊妹，起碼少咗一重你估我，我算你的麻煩事」

我家上一輩就係咁, 開頭一個出技術一個出錢 ...

我而家做人咩都講明先, 亦講得好清楚有咩細節, 無謂日後拗. 盤棋都未捉就問有咩獎, 永遠唔會有第一步. 合則來不合則去, 有強姦無焗賭, 大家可以隨時唔玩, 況且合組團隊只係第一步, 要佢明白佢都可以做到, 係要溝女咁溝, 要時間, 我自問都唔係人哋講一講我就明白, 所以一切都要時間處理. 佢同我當初一樣, 唔係輸架生, 唔係輸人際關係網絡, 係輸信心, 要對自己有信心最重要.
或者......你講果個情況係大家無講明點分享成果及各樣情況, 即使牌頭有變, 一家人, 我相信隨時可以攤開嚟講, 如果不合意可以唔玩, 完全不帶走一片雲彩. 如果一有事, 又無嘢可依據......即使有依據, 正如Dr講, 當雙方都亂嚟, 不守法, 不守遊戲規則, 法律係無用, 因為只要雙方都有一個共同目標, 真真正正信任對方, 好事至會發生, 至會有成果. 正如之前講, 如果一嚟左諗右諗, 估來估去, 做鬼咩? 雖不致於各懷鬼胎, 起碼唔係上下一心, 未出戰已輸九成, 你話場仗點打?
我仍相信患難見真情, 家姐昔日咁樣對得我, 我已經欠咗佢一舖, 即使他日有狀況, 我也釋然不再過問, 因為最終最終係我的選擇. 而且, 識咗家姐咁多年, 佢份人大概係點我好清楚, 起尾注呀股東不和呀呢D絕不存在, 因為我起壇翻譯公司, 由我自己一人打庄, 佢頂多係幫庄, 係無title. 其實, 楊兄, 無title比有title仲大件事, 因為我信佢, 一個信字搞掂, 正如以前好多人戰亂托孤一樣, 唔通走難時要你寫合同, 打手指模? 人家一信你, 係將佢的名譽, 作為, 金錢及個人誠信押在你身上. 民無信不立, 唔信你, 九百幾頁合約, 又non-disclosure agreement又盛, 搞鬼咩? 賺賺埋D錢比晒師爺皮, 我至無咁蠢. 所以, 打從我昨日開始搞網頁, 成立自己個檔口, 心目中嘅人選共同協力, 我都係用一個信字行先, 睇錯人, 就當自己無眼光. 而我好相信目前小本經營的話, 資本多或人多唔一定贏人, 而係講緊兵貴神速. 一間公司真係做到嘢嘅, 三幾條友就夠.

楊灝貽

erict 發表於 2016-8-2 19:07
我而家做人咩都講明先, 亦講得好清楚有咩細節, 無謂日後拗. 盤棋都未捉就問有咩獎, 永遠唔會有第一步. 合 ...

都係發達之後可能出現或不出現嘅問題, 祝你發達
好似郭生咁將搞生意/企業王國比喻成搞遊樂場
冇戰場咁緊張嘅

erict

楊灝貽 發表於 2016-8-3 13:22
都係發達之後可能出現或不出現嘅問題, 祝你發達
好似郭生咁將搞生意/企業王國比喻成搞遊樂場
冇戰場咁緊 ...

　　多謝。望係咁望，最緊要步步為營。其實呢次是否成功，我都唔知，但看似有數圍而又做得到，我至放膽做。總之，我而家同任何人一有合作，一個信字行先再加上樣樣先講明，一有差不多先生式求其處理，隨時埋下計時炸彈，小則大家破財，大則雙手不高興，到時你話我我話你，由大家開心到雙方結怨就無謂喇，非常浪費時間又戇居，因為，人總係對自己傾斜，你可能聽到人哋同你訴苦，十之八九都係佢啱人哋唔啱，但事實係咪咁呢？打句問句你都唔sure，因為一有狀況，好多人係選擇講對自己有利的事講，而唔會好公道好客觀就事情整體嚟講。而我眼見不少事發生，根本雙方都有問題，有時好難講係黑白分明，皆因去到底，你都係局外人，你對果件事知幾多，係咪先？
　　以我過往經驗，一用先講明呢三個字，起碼少七八成麻煩，或者可以再加多一句，大家可以隨時唔玩，絕對不會覺得唔舒服，始終合則來不合則去，你有你的盤算，我有我的想法。正如男女之間兩情相悅，有feel至一齊，而一齊又有非一般的閱歷，有非一般的高低起跌，至可以長久。否則，冇feel又或者熱情早已冷卻又不想繼續的話，不如瀟脫一點分手，再見亦是朋友，對嗎？