愛國派與港獨

yinkk

人大對基本法104條釋法，皆因兩位少不更事嘅新科議員梁頌恆與游蕙禎意氣用事，不經大腦，宣誓就職時亂咁噏，玩大咗而導致；結果俾梁振英捉到藉口，大肆炒作，「養兵千日，用在一時」嘅數以千計註冊社團突然全部浮面賣廣告譴責梁游，造大聲勢，一般小市民，尤其是老一輩基層，咪一唱百和囉。
以左丁山所見，老年人（60歲以上）對梁游「支那」說，大都憤慨大駡。中年人之中（40至60歲），就分派別，親建制派自然大駡，而反梁特派亦唔多敢為梁游辯護，最多係封口啫。至於年輕人（30歲或以下）就駡釋法者居多，對佢地來講，「支那」只係一個代號，並無大不了，年紀愈輕，愈係認為梁游並無反感。
呢日成班老校友坐埋食飯，講呢件事講到不亦樂乎，中貿林話：「有乜理由年青人不識中國歷史，港英埋下地雷，廢歷史科，其心可誅。」左丁山對教育改革，知得比較多，多年前參加過教育改革諮詢，即刻為港英呼冤：「改革教育課程之事，係梁錦松、程介明、戴希立三頭馬車在回歸後搞嘅，母語教育係董建華確立嘅，廢中國歷史為獨立科目係李國章、羅范椒芬主掌教育局時推行嘅，完全唔關英國人事，件件都與愛國建制派有關，親左派人士，教聯嘅何漢權係中史教師，佢每個星期在信報專欄大駡，哀嘆中學廢除中國歷史成獨立科，爭取中國歷史為必修科，歷來每一位特區政府教育局長都唔聽佢支笛！」
令中學生、大學生不懂中國歷史，培育出本土獨立觀念，係回歸後中學教育問題，與港英無尤，唔好亂咁鬧係外國勢力搗亂，美國人磅水。飯局中有中貿C，佢自己講：「我堂弟係高級行政人員，堂嫂係駐北京高管，唔多唔少靠中國食飯，但佢地個女，我嘅堂姪女十幾歲啫，呢幾年來愈來愈憎梁振英與北京，都唔知點解，佢直情唔肯上京遊覽呀！其實佢對中國根本無認識！」為何如此，大家都不知，中貿林、中貿C讀大學時，與港大中大同學爭住上京遊覽，與今日大學生對北京嘅態度完全不同。今日之年青本土派回歸時只有四五歲，冇受到過港英中小學教育嘅，記得2012年時，本地大學生絕大部份擁梁反唐，間接支撐咗梁振英嘅民望，任期5年不到，梁振英在大學竟如過街老鼠，梁游出身城大嶺大，都係梁特做過校董會主席嘅，諗起嚟，梁振英上台與港獨思潮興起，不無關係，與愛國人士把持教育局與教育政策不無關係！



左丁山

容燥兒

整段文章，我感受到時空識以及無常。

呢篇嘢，值得引入大學課程為教材。

中學會考考試題目，就真係認真一流