20170108郭博士開示【被人搵笨招貴人 】

erict

　　我估計係咁：有人搵你做嘢，目的可能係：一，佢等人用而你有能力，二，佢欣賞你有能力但未交過手，唔知你能力去到邊。

　　以一般情況及用上商業上的價格談判，即使佢知道你做到嘢，但未知你有幾高能力，大多數人初頭都會以試的心態對待。即使去街市有檔嘢新開張，明知D嘢好好食，店主都可能用減價招徠，正是唔怕你精，唔怕你呆，最怕你唔來。而站在顧客方面思考，亦有風險，因為始終都未試過，有幾好食，到最後都係停留在聽人講。如果用較低成本一試，或會踏出第一步。好喇。一試過，好食，店主又有功夫又均真，假以時日，慢慢加價加上去都未遲。

　　而博士講佢以前整車對住差佬都會任比，無價錢，因為，當時身為差佬，疊水，又可能有不少差佬夠豪氣，見你反而任收，唔詐型，亦可能捉正差佬個心態，因為如果身為差佬又正正係果陣時個個都要型，好多時英雄地最怕比人唱，所以，明明整完車應該係收二十元，差佬都可能豪D，比夠二十五三十元。而有一次博士講，整好車時，先打電話去打聽阿Sir心情靚唔靚，整笛好架車阿Sir又happy，九成可能醒多一個幾毫。

　　因為所謂比人搵笨實，至少你有少少能力在某方面先，如果你無能力，人哋連搵你笨實嘅機會都無。但如果你真係好有能力，次次有難題，係搵你至掂，可能對方都唔敢睇輕你，或者刻薄你。因為去到某個位，如果你比人另類包起（即係某大公司以高薪請你），佢即時連一個可以幫到手的好伙伴都無，到最後最蝕底果個一定係搵你笨實果個。

　　郭博士的開示令我想起心量一定要大。我都見過好多左算右算，自作聰明，倒頭來係一場空，咩都無。正如以前打工，見過有條友外國番嚟，扮晒有質地，一食飯埋單，例唔比錢，人哋幫佢比先再夾番，佢就永遠扮失憶，踢一踢至郁一郁，哎呀係喎咁樣，扮懵扮到出神入化。之後，人人都怕左佢，唔敢搵佢食午飯。到最後，邊個損失最大？

erict

yc_ray 發表於 2017-1-10 09:40
呢個問題都有少少同感。不過我就睇人。所以唔能夠講我係「被搵笨實」。更多係「賣個人情」。
「搵笨實」的 ...

　　家家有求，其實到最後計條數都是誰需要誰。
　　李生檔生意咁鬼大，十幾年前已經發債券，無記錯的話係年息都有成幾厘（十幾年前在信報睇到），好似仲高過好多大投資銀行債券基金......其實李生都有所求，用個牌頭引入現金。真係好睇個情況是誰需要誰。
　　如果換一個方法演繹，搵笨實就係退一步海闊天空。要取決於賣$100而三日發一次市，還是$60而貨如輪轉；要求精選客戶還是不停擴大商業網絡，都好視乎你做緊邊一行。但如果純計賺口碑，例如：喂，果個erict係傻仔嚟架，出面賣一百佢賣六十，貨又一樣，去佢度買賺四十，點解唔去先？唔去佢度買我就真係傻仔喇......759就係咁樣日日做傻仔，傻到可以上市（雖然呢一兩年生意差D）。

erict

　　做人肯蝕底肯行多兩步，其實真係有著數，表面睇可能係傻仔，其實可能係天道酬勤。肯捱義氣又平靚正，又唔會諗嘢諗到仙屎位，真係唔荒無機會出頭。

erict

　　最近回顧了一些事，深深感覺比人搵你笨其實好著數。至少，你有一個舞台發揮先，舞台都冇，你難以顯身手，識飛都死。
　　搵笨，個個定義可能唔同，但好肯定嘅係，人人學做一件事，都有過程。過程，包括金錢，時間等等。前者，即係交學費；後者，你會更能掌握某事，功多藝熟。
　　玩任何一個遊戲，表面同內裡絕對係兩回事。計蓆面條數，多數冇錯，其實咁先死，一路錯落去；從另一層看，明明係蝕底，但回頭拉勻條數，竟然係正數。事關好多嘢我認為唔係純粹數字咁簡單，你賺到嘅可能係口碑，人哋介紹，撻長計。如果用公司計營業額，所謂account management，一個客或一間公司成為你嘅客，係全部有得計，但如果你撒下種子，多邊投注，中一棍可能將來係顆大樹，就唔同計法喇。
　　再講，以搵食層面計，你好難單打獨鬥勝出一場又一場嘅競賽，如果用博士方法，變相有人同你賣廣告，又或者做多兩做，人哋睇呢條友育蝕底，又在過程中有交帶，說不定會入股，合作做生意，三七四六分帳等等，你自然可以有一個算係好嘅合作伙伴／拍檔／傳聲筒同你賣廣告，除笨有精呀！