2015.4.1 Auntie輸少少！索爆徐子珊 冇得拉頭馬

peterau

http://hk.apple.nextmedia.com/realtime/racing/20150401/53592920

韋達近排畀雷神同潘頓輪住砌，想贏場馬都難，但呢晚佢把握場地形勢同座騎擅放優勢，夥拍告廐落飛馬3.7倍之「歡喜」沿欄一放到底，勝出第四場四班千二米，堂堂13屆冠軍騎師都算苦盡甘來。
不過話需說回來，韋達騎「歡喜」交足功課，人馬合作三戰兩冠一亞全入Q，而大告訓練「歡喜」亦不斷有貨交，上次由呂卓賢減磅贏，今勻加磅加分都再下一城，五歲馬完成轉倉後三捷，佢嘅訓練同部署功勞唔可以抹殺。
比較唔好彩嘅係「金筷子」練馬師李易達，此駒上仗開齋後存心再爆一次，可惜早段落後太多追得切，輸頸位飲恨做二奶，達哥殺「歡喜」呢匹舊部不成之餘，自己更贏唔到季內第15win，搞到仲未達標，三、四名分別係熱門之一「星際武士」同全熱門「大勇士」。
「金筷子」搏失，李易達唔開心外，無綫當家花旦35歲的徐子珊亦失望，呢晚佢特登入場幫「金筷子」金礦團體一位馬主auntie打氣，徐子珊最近有新劇《以和為貴》熱播中人氣十足，佢嘅出現成為場內焦點，可惜未能帶旺「金筷子」，功虧一簣無緣落凱旋門拉頭馬。
告達理指「歡喜」今季有顯著進步，沒有以往般急躁，馬匹體重亦升穿一千磅，馬身更為有力，今仗贏在輕磅及韋達發揮佳。告達理又表示「歡喜」已證明在四班亦具爭勝能力，1000至1200米均可勝任。