不如我地一齊揀冰鮮雞咯！

陳柱民

不如我地一齊揀冰鮮雞咯！

卓韻芝

呢排成日同婆婆飲早茶，晨早8點啲 friend。因為我發現婆婆喺朝早係最精神嘅，過左下午，佢嘅能量就會減低，好似小朋友。朝早，佢會見晨運朋友，我就變左同一班阿婆去飲茶，佢地好得意，飲完茶會一齊去街市，5個人揀1隻冰鮮雞。佢地冇咩特別嘢做，只係想熱熱鬧鬧，只係唔想孤獨，只係珍惜對方嘅友誼；做咩？冇所謂啦。

做人好奇怪，一生不停追，每個抱負都非常真實，每個抱負都好似唔實現唔得，但到最後，你只想過吓日晨，諗起仔女嘅時候唔需要擔心。喺婆婆身上，我學識左好多嘢，雖然佢從來唔會擺出教精我嘅姿態，但佢令我明白，當刻自己追求嘅，最終都未必係自己覺得最重要嘅。惟有同佢相處，真正融入同理解佢嘅生活，我先至能夠學識最需要上嘅一課。我珍惜同佢一齊生活嘅所有時間，就算只係柴娃娃去揀冰鮮雞，對我嚟講，都係好真實嘅快樂。佢地呢，成日講起以前開心嘅嘢，可以重複講，重新笑；悲哀好似唔太存在，可能人到老左，只會想記住開心嘅事。

今日，我為將來收集快樂嘅回憶，第時慢慢駛，笑話，重新笑一次；冰鮮快樂，慢慢享用。

把握當下，係明白好多嘢都會走，惟有記憶，會留。