鬼仔性格 - 左丁山

陳柱民

一位田先生，年逾花甲，仍然話自己有「鬼仔性格」，有話直講，不會藏在心中，總之講完、講過之後，個心就會舒服啲。香港有不少人受西方教育，係唔係個個都有鬼仔鬼妹性格？何謂鬼仔鬼妹性格？唔通西洋人有特殊DNA，與唐人唔同，具唐人性格之人就會把要說的話藏在心中，有機會先至在背後放箭？嘩，講到性格DNA，要請教陶傑先至得，左丁山梗係唔識。

從表面觀之，既然話自己有鬼仔性格咯，咁上北京、入西環中聯辦之後，會唔會有話直說，對看不順眼之事，巴啦巴啦咁嘈一輪，盡洩心中情呀？我地無從得知，只知到上一次有另外一位政協田先生以「鬼仔性格」講完一啲嘢之後，就俾中央搣柴。於此我地可以睇到，所謂鬼仔性格也者，只在香港發酵，上到北京，人會變性，發揮唐人性格先至啱咯。

既然如此，好心唔好出嚟噏得出就噏，以免被人恥笑。呢日早上在中環街市外撞到一位富豪二代，年紀與兩位田少不相上下，但佢好怕曝光，靜靜雞嘆世界，無以尚之，佢又咪係留學西洋，但全無鬼仔性格噃。佢對左丁山講：「睇618之役，我啲老友記全無政治規劃，睇見眼冤。我地班人識搵錢嘅啫，邊識玩政治呀，加入政壇一定唔做得民主派，一定要搵隻眼睇住自己檔生意，睇住珠三角間工廠，唔好同中聯辦對着幹，唔好說話得罪中央。有錢有生意而要做議員，根本就係自我摧殘、自毀性格。日日言不由心，長久會有神經問題。」左丁山問佢：「既然如此，點解啲建制派年青富二代紛紛出嚟露面做公職，想上位？」呢位老富二代話：「建制派要培養接班人啫，但苦無人才，咪叫自己啲仔女上陣囉，有人叫我放大仔出去歷練下，我一口拒絕，有錢人家仔女包括我在內，有邊個唔係留學英美起碼十年八年㗎，讀名校，熟習英美上流社會生活，點會真心相信共產黨吖，跟大隊上北京，為咗做生意搵銀之嘛，調轉頭，共產黨又點會真心相信我地呢班好嘆紅酒，打高爾夫球，聽吓西洋歌劇嘅資產階級人物？利用吓啫，而且我地下一代多數精於英文，中文求其，對中國文化歷史認識膚淺，點會同共產黨精英埋到堆喎？」咁講法，香港政治接班人咪要自工聯會搵下一代？富豪二代大笑一輪，然後講：「民建聯至今未搵到一個醒得過曾鈺成嘅喎，工聯會去邊度搵到一個講英文好似余若薇嘅新陳婉嫻？」

http://hk.apple.nextmedia.com/supplement/columnist/art/20150702/19204835