奶粉騙案中，失款達四百一十多萬的苦主Y小姐，是最早一批受害人，她聲稱除了當中的70萬元「私房錢」外，其餘全都是親朋戚友的貨款，她昨日面對記者時哭了出來，「我真係覺得自己好蠢，信錯咗人，如果唔係有老公同屋企人支持，我諗我真係過唔到！」
■苦主Y小姐接受訪問，稱向親友集資 拆家被呃410萬
二十九歲的Y小姐育有一名兩歲兒子，與做外牆工人的丈夫居於大窩口邨公屋，一家三口靠丈夫月薪萬多元生活，雖然過得「掹掹緊」，但兒子的出生為夫婦帶來不少歡樂。可是，全職家庭主婦的Y小姐沒想過變成「債仔」，無故孭起了三百四十多萬元街數。
「每罐抽番十幾蚊佣」
她向記者稱，去年七月經妹妹介紹得知有平價奶粉訂購，因而結識女騙徒Angel，雙方更約出來見面食飯，「佢話自己識供應商，又大住肚，大家都係媽媽，對佢戒心低咗！佢一家三口連佢媽媽都有出來，估唔到成家都係一夥。」
Y小姐與其他受害媽媽一樣，經多次交易都相安無事，其後貨量和金額越滾越大，「好多朋友都經我攞貨，越訂越多，我每罐抽番十幾蚊佣，諗住賺啲外快。」
變身拆家的她，去年九月二十三日入了近二百萬元奶粉、尿片，收貨後令她信心大增，再加碼入貨，最終對方以「佔中」為由，一拖再拖，至今連電話號碼也停用。雖然她最近已向親友籌措一百萬元清還部份欠款，但為了還債，近日她四處搵工，「我企出嚟係唔想再有人好似我咁蠢！」
| 
發表於 2015-3-16 17:35:59
收藏
